بورســــــــــــــــــــــــعيد
بورسعيد تاني وتالت ورابع
الحكاية مش مطش كورة
في دوري سابع
الحكاية حكاية وطن
مستباح العقول والمسامع
منذ ألاف السنين والفرعون فينا طامع
لما يحب يلهي شعبه ويبعد عينه ع المطامع
يبدأ تشغيل المطابع
والكتبة تكتب تمجد
وينزل يزور ويفتح في المصانع
وكأن المكر في دمه طابع
ولما تقوم بينا ثورة .. طبعاً هتختلف المطامع
مستحيل واحد م الرعاع يبقي في الكرسي طامع
ولما الكرسي من تحته يهتز
ميبقاش عنده غير القتل رادع
ينادي بأعله صوته يقول دوروا لي
علي أمكر الكون عقول اللي من خيرنا راضع
يحضر في الحال يقول: أؤمر نضرب بالمدافع
وتنفتح طاقة جهنم وتحصد أرواحنا المدافع
وينقسم الشعب بين ممجد للشهيد
وبين من رضي بالذل خانع
وينطق ضعيف الوطن ياريت أيام فرعونا دامت
ويصبح الأمن في بلدنا كالنجم في السما لامع
لأن الفرعون خيرنا ما بين الأمن والذل
أو الفوضي والخراب يبقي جامع
لكن بدون ما يدري
إن الأرواح اللي حصدتها المدافع
جمدت قلوبنا في كل حارة وكل شارع
قال شبيهه اللي بالطبع
هو التاني في الكرسي طامع
ولعوا الفتنة بينهم
في كل كنيسة وكل جامع
خلينا نخلص منهم
ونلهيهم بدمهم يجري بينهم
ويبقي بحور في الشوارع
ساعتها هينسوا ثورتهم
وإن مكنش نفكر في حل تالت ورابع
لكن الشعب بصموده
بيخرج الفرعون عن شعوره
وأصبح بيشوف في منامه
كل ليلة الكرسي والع
نادي الفرعون في عرافينه
وإنعقد المجلس
وقرر يستعين بكل طامع
والمهمة
عاوزين نشوف الشعب المجرم دا راكع
المخطط مطش كورة
ومفيش أنسب من بورسعيد
جماهيرها عقلها من الكورة لاسع
وبينها وبين جماهير الأهلي طار بايت وضايع
إنفخوا النار في الرماد
والأمن خاين بإعتياد
والقتلة مأجورة تدخل الإستاد في المعاد
وتنطفي الأنوار وتبدأ مجزرة الرعاع
وبالطبع يتلهي الشعب فترة
ينسي فيها اللي قتل واللي باع
ويتنصب السيرك لعمل دستور
يحمي الخونة والسباع
لكن الشعب تاني بصموده
خلي الفرعون عقله زي شعره طار
ودعا تاني لأجتماع
وقال: حلوة حكاية بورسعيد
لهت الشعب فترة
كانت بالنسبة للفرعون ومجلسه عيد
حركوها من جديد
مش مهم نضحي المرة ديه بكل أهل بورسعيد
إبعتوا يلا قوام الهمام م السباع والضباع
خلوا مصر كلها تحكي وتتكلم شهور
وبدت البشاير تظهر بوضوح
بتأسيسية دستور أعور مفضوح
ولسه ياما في الجراب يا حاوي
طول ما إحنا سايبين ثورتنا من إيدينا تضيع
وفرعون بيحصن في نفسه وبيبني في القلاع
قومي يا مصر وطالبي بحقك
عمر ما فيه حق وراه مُطالب وضاع
ودي كانت حكاية شعب حلم بثورة
وحلم قصاده فرعون إن حلم الثورة للشعب ضاع
كلمـــــــــــــــــــــــات: عبد الفتاح
بـــــــــــــــدر
ليست هناك تعليقات:
إرسال تعليق