محنة وطن
لوطن وأمة في حُب أولادها تُمتَحن
القاتل شهيد ... والشهيد مات من غير ثمن
والسياسي قلبه قاسي ممكن يبيع بطبعه لأنه غير مؤتمن
المهم يكون له نصيب من جسد الوطن
أه يا بلدي
يا تاريخ حي عشت ألاف السنين تُمتَحن
والنهاردة بإيد ولادك تمتهن
كلنا مذنبون في حقك يا مصر
اللي باع الوطن وبني بتمنه لنفسه قصر
واللي سكت وضاع حقه وخسر
واللي قال: "إرحل" للشرعية وهيه بتحاول له تنتصر
وإللي لتاريخ أمة في أقزام بِيَختصر
وإللي قال: "بيع" فاكر إن مصر هتضيع و غَدَر
واللي قال: "خلصونا من شرع رب البشر"
واللي صَدَق كُل خاين و خرب و دمر حتي الأثر
يا كل مصري لسه جواه حس مصري "فووووووق"
مصر نجم عالي مش هيسقط مهما زاد القلق
وأكيد كل الفلول رغم سطوتها من الحق هتتخنق
مصر مش محتاجة جبهة إنقاذ تحميها من الغَرق
مصر محتاجة ولادها المُخلصين
يطفوا كل شعابها اللي بنار الفتنة بتتحرق
فوقوا أرجوكم حرام ثورتكم من بين إيدكم بتتسرق
أه يا بلدي أه يا مصر عايشة جوايا مش كلمة علي الورق
معقولة أهلك صدقوا إن ثورتك "كانت ضي في العتمة وبرق"؟
معقولة كل الأمن فيكي ضاع؟
معقولة إتقسمنا بين اللي إشتري وبين اللي باع؟
معقولة هنرجع تحكمنا الرعاع؟
معقولة إتحرم علينا فيكي الإجتماع؟
معقولة أصبح عنوانا بعد الكرامة عبيد الإنصياع
وإختصرنا المشكلة في "محنة وطن" أصبح فريسة للسباع
والله يا مصر لو وزعوا دمي مع كل قطرات المطر
وروا بها طرقاتك لأعيدلك حريتك ومجدك اللي ظنوا إنه إتأسر
وأرجعك شمس تنور الزمان وإلا خسارة فيا كلمة بشر
كلمات: عبد الفتاح بدر
ليست هناك تعليقات:
إرسال تعليق